ትካል ምርምር ኤርትራ ንፖሊሲን ስትራተጅን (ERIPS)፡ ነዚ ኣብዚ ቀረባ እዋን ብሰበ-ስልጣን ጀርመን ኣብ ልዕሊ ኤርትራውያን ስደተኛታት ዝተወስደ ዘይፍትሓዊ ስጉምቲ ብትሪ ከምዝኩንኖን፡ ነቶም ስደተኛታት ከም ጥርጡራት ግብረሽበራ ምግላጽ ብቕጽበት ደው ክብል ከምዝግባእን፡ ብወግዓዊ ህዝባዊ ኩነነ ገሊጹ።
ንብዙሕ ዓመታት ኣብ ብርክት ዝበላ ሃገራት ምዕራብ ዝርከቡ ኤርትራውያን ስደተኛታት፡ ብጉጅለ ህግደፍ ንዝተዳለዉ ናይ ፕሮፓጋንዳ ጽምብላት ብሰላማዊ ሰልፊ ተቓውሞኣኦም ክገልጹ ምጽንሖምን ዝጠቀሰ ERIPS፡ እቶም ባህላዊ በዓላት ተመሲሎም ብህግደፍ ዝካየዱ ፍጻሜታት፡ ኣብ ወጻኢ ንዝርከቡ ኤርትራውያን ስደተኛታት ንምፍርራሕ ዝዓለመ ናይ ፕሮፖጋንዳ መድረኻት ብምኳኖም፡ ኣብዚ ቀረባ እዋን፡ ብፍላይ ኣብ 2022ን 2023ን፡ ኣብ መላእ ዓለም ዝርከቡ ኤርትራውያን ማሕበረሰባት፡ እንተላይ እቶም ኣብ ጀርመን ብማዕበል ብርጌድ ንሓመዱ ዝተኣከቡ መንአሰያት፡ ነዚ ብስርዓት ህግደፍ ካብ ኤርትራ ዝፍልፍል ዘሎ ጨቋኒ መልእኽትን ምፍርራሕን ስግረ ዶባዊ ጸቕጥን ንምቅዋም፡ ሰፋሕቲ ሰላማዊ ሰልፍታት ብምክያዶምን ንዓመጻዊ ተግባራት ጉጅለ ህግደፍ ብምኩናኖምን ጥራሕ ግብረሽበራዊ ዝብል ስያመ ክወሃቦም ቅቡል ከምዘይኮነ”ዩ ኣረዲኡ ዝርከብ።
ገለ ካብዞም ናይ ተቓውሞ ሰልፍታት፣ ብተቓወምቲ ጉጅለ ህግደፍ ጥራይ ዘይኮነስ፡ ደገፍቲ ህግደፍ ብዝፈጠርዎ ምትኹታኽ ናብ ጎንጺ ብምስግጋሩ፡ ኣብ ልዕሊ ሰልፈኛታት፣ ኣኽበርቲ ሕጊ፣ ኣብ ልዕሊ ንብረትን ጉድኣት ብምውራዱ፡ ብርጌድ ንሓመዱን ሰፊሕ ማሕበረሰብ ስደተኛታት ኤርትራን ምስዚ ሕጋዊ መስርሓት ምሉእ ብምሉእ ምትሕብባር፡ ንሰላማዊን ሓባራዊ ድሕነትን ምኽባር ሕጊን ዘለዎ ተወፋይነት ኣርእዩ ክነሱ፡ ከም ገበነኛ ክጥቀስ ሞጎታዊ ዘይምኳኑ”ዩ መግለጺ እቲ ትካል ዘረድእ።
ሰበ-ስልጣን ጀርመን ኣብዚ ቀረባ እዋን ኣብ ልዕሊ ኤርትራውያን ስደተኛታት ካብ ገዛ ናብ ገዛ ብለይትን ብዘፈራርሕ ኣገባብን ዘካየድዎ ዘለዉ ተፍትሽ፡ ንስድራቤታት ኣሸቢሩ ንህጻናትን ኣደታትን ውን ራዕዲ ፈጢሩ ምህላዉ ዝጠቀሰ እቲ መግለጺ፡ ነዞም ስደተኛታት ጥርጡራት ግብረ ሽበራ ኢልካ ምጽዋዕ ዘይመጣጠንን ዘይፍትሓውን ጥራይ ዘይኮነስ ዘጨንቕን ድርብ መለክዒ ዘንጸባርቕን ከምዝኮነን ውን”ዩ ዝገልጽ።
እብ ጀርመን ብቐጻሊ ከምዚ ዓይነት ጎነጻዊ ፍጻመታት ከምዝኽሰትን፡ ኣብ ባሕቲ ግንቦት (መዓልቲ ሰራሕተኛታት) ኣብ መንጎ ደገፍቲ ዝተፈላለያ ክለባት ኩዕሶ እግሪ ዝተፈጥረ ጎንጽን፡ ከምኡ’ውን ኣብ መንጎ የማናውያንን ጸጋማውያንን ጉጅለታት ዝፍጸምን መብዛሕትኡ ግዜ ናብ ግነጽ ዝዓቢን ናይ ግጭት ሰልፍታት ከም ኣብነት ዘቀመጠ ERIPS፡ እዚ ፍጻመታት እዚ ዋላ እኳ ከቢድ ክሳራታት ዘስዕብ እንተኾነ፡ ከም ግብረሽበራ ዘይኮነስ ከም ሲቪላዊ ዘይምእዛዝ ዝግለጽ እንዳኮነ፡ ኣብ ልዕሊ ኤርትራውያን ስደተኛታት ብፍሉይ ተሪርን ዘይመጣጠን ስያመን ምውሳድ ግን ዘይፍትሓዊን ዘይቅቡልን ምኳኑ”ዩ ዝገልጽ።
ኤርትራውያን ስደተኛታት ናብ መንግስቲ ጀርመን ወይ ትካላቱ ወይ ውን ናብ ህዝቢ ጀርመን ዝዓለመ ዓመጽ ኣቕኒዖም ከም ዘይፈልጡ ምፍላጥ ወሳኒ ዘተሓሳሰበ እቲ መግለጺ፡ ስግረዶባዊ ምዕፋን ጉጅለ ህግደፍን ስለያዊ መሓዉራቱን ንምቅላስ ዝክየድ ከይዲ፡ ግብረሽበራዊ ዝብል ስያመ ክወሃቦ ባህታዊ ሓቂ ከምዘይኮነ”ዩ ዘነጽር።
መንግስቲ ጀርመን ኣብ ተቃለስቲ ኤርትራውያን ዝገብሮ ዘሎ ናይ ምስይጣን ተግባራት ደው ከብል ዝጽውዕ 3ተ ነጥብታት ዘቅረበ ERIPS፡ ዘይምኽኑይን ሓይሊ ዝተሓወሶን ተፍትሽ፡ ንኤርትራውያን ስደተኛታት ጥርጡራት ግብረ-ሽበራ ኢልካ ምጽዋዕን ደው ክብል፡
መንግስቲ ጀርመን ብጉጅለ ህግደፍ ኣብ ልዕሊ ኤርትራውያን ስደተኛታት ንዝወርድ ዘሎ ዓመጻዊ ክውንነትን፡ ስግረ-ዶባዊ ጸቕጢን ብወግዒ ኣፍልጦ ክህብ።
ከሙኡ ውን ምስ ቀንዲ ደሞክራስያዊ ባህልን ክብርታትን ኣህጉራዊ ግዴታታትን ጀርመን ዝሰማማዕ፡ ንኤርትራውያን ስደተኛታት ፍትሓውን ሰብኣውን ዘይሻራዊን ኣተሓሕዛ ከረጋግጽ ጸዊዖም።
