መራሒ ሶማል ካብ መጥቃዕቲ ቦንባ ንስክላ ከምዘምለጠ ተገሊጹ።

ፕረዚደንት ሶማል ሓሰን ሸክ መሓመድ፡ዕጡቓት ኣል-ሸባብ ኣብ ከተማ ሞቓድሾ ካብ ዝደርበይዎ ቦምባታት ንስክላ ከምዝተረፈ ሮይተርስ ገሊጹ።

ድሕሪ”ቲ ፍጻመ ክልተ ላዕለዎት ሰበስልጣን መንግስቲ ሶማል  ንሮይተርስ ኣብ ዝሃብዎ ቃል፡ እቲ መጥቃዕቲ ኣብ ልዕሊ ፕረዚደንት ሓሰን ሸክ መሓሙድ ዘነጻጸረ ፈተነ ቅትለት ምኳኑ ዝገለጹ ኮይኖም፡ ይኩን እምበር ሓሰን ሸክ መሓሙድ ብዘይዝኮነ ይኩን ማህረምቲ  ካብቲ ሓደጋ ተሪፉ ኣብዚ ሰዓት ኣብ ውሑስ ቦታ ከምዝርከብ ኣረጋጊጾም።

ኣብቲ ቦታ መጥቃዕቲ ዝነበሩን ወተሃደራትን ነበርትን ናይቲ ከባቢ ዝኮኑ ናይ ዓይኒ መሰካክር ኣብ ዝሃብዎ ቃል፡ ነቲ ፕረዚደንት ዝሓዘት መኪና በቲ መጥቃዕቲ  ከምዝተሃርመት ንሮይተርስ ዝሓበሩ ኮይኖም፡ በቲ ኣብ ጥቓ ቤተ መንግስቲ መቃድሾ ዝተፈጸመ ናይ ቡምባ መጥቃዕቲ፡ ዝሞቱ ኣርባዕተ ሰባት ከምዝነበሩ ውን”ዩ ሪፖርተር ሮይተርስ ዘረጋግጽ።

ዕጡቅ ሓይሊ ኣልሸባብ ምስ ኣልቃዒዳ ዝምድና ብዘለዎ ናይ ቴሌግራም ቻነል ኣቢሉ ኣብ ዝሃቦ መግለጺ፡ “ሰራዊተይ ንሓሰን ሸኽ መሓመድ ዝጸዓና መካይን ካብ ቤተ መንግስቲ ወጺአን ናብ መዓርፎ ነፈርቲ ኣብ ዝኸዳሉ ዝነበራ እዋን ዒላማ ገይሮመን ኣለው” ብምባል ምሉእ ሓላፍነት ከምዝወሰደ ኣፍሊጡ ይርከብ።

ነቲ ፍጻመ ስዒቡ መግለጺ ዝሃበ መንግስቲ ሶማል፡ ፕረዚደንት ሓሰን ሸክ መሓሙድ ኣብ ጽቡቅ ኩነታት ምህላዉ ገሊጹ ይርከብ።

ድሕሪ”ቲ ዝተፈጸመ ሽበራዊ መጥቃዕቲ፡ መንግስቲ ሶማል ኣንጻር ሽበራዊ ጉጅለ ኣልሸባብ ወተሃደራዊ ወፍሪ ጀሚሩ ምህላዉ ዝተገልጸ ኮይኑ፡ ኣብቲ ዝካየድ ዘሎ ወተሃደራዊ ወፍሪ፡ ቱርኪ ኣመሪካን ኢትዮጵያን ኣብ ጎኒ ሰራዊት ሶማል ብምስላፍ፡ ናይ ነፈርቲ ደገፍ ይገብራ ምህላወን”ዩ ዝረኸብናዮ ሓበሬታ ዘረድእ።

ኣቀዲማ ሰራዊት ሶማል ዳክታር 2B ዝተሰምየ ዘመናዊ ድሮን ከምዝዓጥቅ ዝገበረት ቱርኪ ብተወሳኺ፡ ኣካንጂ ዝተሰምየ ክልተ ተወሰኽቲ  ሰብ ኣልቦ ነፈርቲ ከምዝሃበቶ ዝገለጸ እቲ ሓበሬታ፡ መንግስቲ ቱርኪ ኣልሸባብ ንምድምሳስ ዝተሰለፈ ዝለኣኾ ወተሃደራዊ ሰራዊት ኣብ ሞቓድሾ ከምዝዕስክር ጌሩ ምህላዉ ውን የረድእ።