ካብ ዝሓለፈ ሳምንታት ኣትሒዙ ኣብ ግብጺ ብዝረአ ዘሎ ሃድን ስደተኛታት፡ ኣብታ ሃገር ዝርከቡ ኤርትራውያን ስደተኛታት ናብ ጸገም ተቓሊዖም፡ ካብ ማእሰርቲ ክሳብ ምጥራዝ ዝበጽሕ በደላት ይወርዶም ምህላዉ፡ ምንጭታት ኤሪፒኤም ካብ ከተማ ካይሮ ኣብ ዝሰደዱልና ሓበሬታ ገሊጾም።
እቲ ኣብ’ዚ ዝሓለፈ ሳምንታት ኣትሒዙ፡ ሲቪል ክዳን ተከዲኖም ብዝንቀሳቀሱ ኣባላት መንግስቲ ዝግበር ዘሎ ሃድን ኣንጻር ስደተኛታት፡ ኣብ ልዕሊ ኤርትራውያን ከሙኡ ውን ኢትዮዕያውያን ዜጋታት ዘነጻጸረ ኮይኑ፡ ብፍላይ ከኣ ደቀንስትዮ ግዳያት እቲ ሃድን ኮይነን ክሳብ ናብ ኤርትራ ናይ ምጥራዝ ሽግራት ይወርደን ምህላዉ”ዩ ዝበጽሓና ሓበሬታ ዘረድእ።
እቲ ራክሻን ሞተር ሳይክል ብዝሕዙ ሲቪል ኣባላት ፖሊስ ዝካየድ ዘሎ ሃድን ስደተኛታት፡ ኤርትራውያን ብብዝሒ ኣብ ዝነብርዎ ከባቢታት ፈይሰል፡ ሻርዕ ሱዳን፡ ከሙኡ ኣርድ ሌዋ ምህላዉ ዝሓበሩ ምንጭታትና፡ ብፍላይ ሃይፐር ኣብ ዝበሃል ከባቢ ካብን ናብን ስራሕ ንዝመላለሳ ደቂ ኣንስትቶ ብፍሉይ ይሃድኑ ምህላዎምን፡ ክሳብ ናብ ኤርትራ ዝተጠረዙ ዜጋታት ከምዘለዉን”ዩም ዝገልጹ።
እቲ ዝግበር ዘሎ ሃድን ብፍሉይ ኣብ ልዕሊ ደቂኣንስቲዮ ዘነጻጸረ ምኳኑ ዝሓበሩ ምንጭታትና፡ ወላ ውን ነተን ሕጋዊ መንበሪ ፍቃድ ዘለወን ደቂ ኣንስትዮ፡ ኣብ ቤትማእሰርቲ ወሲዶም ብግዴታ ከምዝፍርማ ብምግባር፡ ናብ ኤርትራ ይመልስወን ምህላዎም”ዮም ዝገልጹ።
ምስ ህግደፍ ዝምድናኡ ዘሐይል ዘሎ መንግስቲ ግብጺ ኣብ ልዕሊ ኤርትራዉያን ስደተኛታት ዘርእዮ ጭካነ ከምዘለዎ ይቕጽልን፡ ነቶም ስደተኛታት ብከዉሊ ካብ ምጥራዝ ከምዘየዕረፈን ዘተሓሳሰቡ እቶም ምንጭታት እቲ ጉዳይ መሰረታዊ ፍታሕ ኽርከበሉ ኣብ ስደት ዝርከብ ኩሉ ኤርትራዊ ጎስጓሱ ከዛይድ ደጊሞም ተማሕጺኖም።
መንግስቲ ግብጺ ፡ ብፍላይ ድሕሪ ምዉላዕ ኲናት ሕድሕድ ሱዳን ነቶም ናብታ ሃገር ዝዉሕዙ ካብ ዘለዉ ስደተኛታት፡ ን ኤርትራዉያን ፈልዩ ይዳጒንን ብከዉሊ ናብ ኢድ ህግደፍ የረክብን ምህላዉ ይንገር።
