ብርጌድ ንሓመዱ ጨንፈር ዴንማርክ ምስ ሚኒስትሪ ኢመግረሽን ዴንማርክ ውጺኢታዊ ዘተ ከምዘካየደ ኣፍሊጡ።
ብርጌድ ንሓመዱ ጨንፈር ዴንማርክ፡ ምስ ሚኒስተር ሚኒስትሪ ኢሜግረሽንን ውህደትን ዴንማርክ ካረ ዲብቫድ`በኽ ውጺኡታዊ ዘተ ከምዘካየደ ብመንገዲ ኣባላቱ ኣብ ዝዘርግሖ ሓበሬታ ኣፍሊጡ።
ኣብ ዴንማርክን ከባቢኣን ዝነብሩ ደገፍቲ ምልካዊ ስርዓት ህግደፍ ዝኮኑ እካበታት፡ ኣብ ዘይሕጋዊ ምስግጋር ገንዘብን ካልእ ተንኮላትን ተዋፊሮም ንዝገብርዎ ገበናት ብዝርዝር ነቲ በዓል ስልጣን ከምዘረዱኡ ዝገለጹ ኣባላት ብርጌድ ንሓመዱ ጨንፈር ዴንማርክ፡ ዘይሕጋዊ ተግባራትን ገበናትን ንምቅላስ፡ ሰነዳትን መርትዖን ብምሓዝ ምስ መንግስቲ ዴንማርክ ክተሓባበር ድሉው ምህላዉ ነቲ በዓል ስልጣን ድሕሪ ምግላጹ፡ ካብቲ ላዕለዋይ በዓል ስልጣን መንግስቲ ውን ኣወንታዊ ግብረመልሲ ምርካቡ”ዩ ኣብ ሓበሬቱኡ ዘረድእ።
ሰበስልጣን ዴንማርክ፡ ምልካዊ ስርዓት ጉጅለ ህግደፍ ኣብ’ታ ሃገር ብመንገዲ እካበታቱ ኣቢሉ ንዝገብሮ ዘይሕጋዊ ተግባራት ብጥልቀት ክምርምሩ ዘተሓሳሰበ ወኪል ብርጌድ ንሓመዱ ጨንፈር ዴንማርክ፡ ብሰምያዊ ማዕበል ዝፍለጥ ናይ ቃልሲ ዕላማ ውን ምስ ኩሎም ደለይቲ ፍትሒ ብምኳን ዴንማርክ ገበነኛታት ኣብ ምህዳን ንእትገብሮ ምንቅስቃስ ክድግፉ ከምዝኮኑ”ውን ዮም ብቃሎም ኣረጋጊጾም ዝርከቡ።
ብዘይካ”ዚ ውን ምልካዊ ስርዓት ጉጅለ ህግደፍ ኣብ ልዕሊ ሰባኣዊ መሰላትን ክብረትን ንዝክተሎ ግህሰት፡ ከሙኡ ውን ኣብ ልዕሊ ስድራቤታት ዝክተሎ ዘሎ ናይ ጅሆ ተግባራት ከምዝተሰማምዑ ዝገልጽ እቲ ሓበሬታ፡ ዴንማርክ ንተግባራት ጉጅለ ህግደፍ ብስቅታ ክትሓልፎ ሞጎታዊ ከምዘይኮነ ውን”ዩ ዝጠቅሱ።
ኣብ መደምደምታ ኣብ ምርግጋጽ ፍትሕን ሰባኣዊ ተሓታትነትን ህዝባዊ ውግንና ከምዘለዎ ዝገለጸ እቲ ሓበሬታ፡ ብርጌድ ንሓመዱ ጨንፈር ዴንማርክ ምስ ዝኮነ ይኩን ኣካል ክዛተን ክሰርሕ ድሉው ምህላዉ”ዩ ገሊጹ ዝርከብ።
